八達通於上星期終於登陸iPhone Apple Pay，本應都算係好事一件，但偏偏又出現技術問題，令一眾由實體卡轉去Apple Pay的用戶轉移失敗，加上其他奇難雜症，帶來不少問題。幸好，今次解決問題都算快手，不過大家使用時都要先了解清楚。

上星期加卡出事點算？
有人在iPhone轉八達通失敗，甚至多手删除了iPhone內的卡，令兩卡皆失效，不過其實問題已經解決，想回復亦相當容易。只要在銀包App點選 「+」，於「卡類」頁面，選擇「八達通」，便能看到你之前轉移過但失效的卡，即使删除過亦可回復，再按「下一步」便可完成。

點樣退卡攞番按金？
想退卡，首先你要有八達通App，App內會看到Apple Pay內的八達通，按「删除及退款」 你便可以選擇以「轉數快銀行賬戶」或「O!ePay」退款。「O!ePay」比較簡單只須一個步驟即可，但用「轉數快銀行賬戶」就比較多選項，不過你亦可退款到不同人的戶口中，按步驟輸入，其實唔難。

退卡會收錢？
冇錯，其實在條款中已寫明，Apple Pay八達通開卡90日內退卡，會收取11元手續費，唔想蝕11元，就要等90日。而即使實體八達通，其實在開卡90日內退卡，亦同樣會收手續費，不過就平少少，收$9。

換新iPhone點轉移？
購買新iPhone或Apple Watch後，登入同一個iCloud賬戶，即可在設定裏面的銀包與Apple Pay，重新加入舊機中的八達通。當然，若是轉會Samsung就暫時沒辦法了，開張新卡罷啦。

公共交通費用補貼點算？
轉移入Apple Pay後，公共交通費用補貼亦會一併轉移，之後用家可直接在八達通App內，點擊Apple Pay八達通領取補貼，毋須去補貼站。當然，你亦可去實體機「嘟」啦。

iPhone8前的舊機用唔用到Apple Pay八達通？
用到，不過你要有一隻Apple Watch Series 3或以上型號配合，而你的舊機也要更新至最新iOS之後打開「Watch」App，選擇「銀包與Apple Pay」，再加入八達通，便可使用Apple Pay八達通，不過當然只限Apple Watch上才可「嘟」到啦。

記者：韓繼聰、梁志穎
編輯：鄒仲安

-----------------------------
成功個案經驗之談 融入台灣資訊大合集
《移居台灣手冊》尋找安樂窩
-----------------------------
中西醫教你急救「口罩肌」後遺症　全面擊退面油口罩瘡
《保健精讀：急救口罩肌》 還原靚靚肌
-----------------------------
打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新