日本女星米倉涼子主演嘅《Doctor X》系列，近年成為收視保證，趁住10月檔新劇陸續開播，被睇高一線嘅第四季《Doctor X》已於噚晚開播，第一集平均錄得20.4%收視，成為今年收視最高嘅日劇，呢集嘅最高收視更錄得25%。

《Doctor X》第四季加入多位新角色，包括生瀨勝久、吉田鋼太郎等好戲之人，仲有《半澤直樹》男星瀧藤賢一，以及電影《談談情‧跳跳舞》女主角草刈民代，更有專演潑婦嘅最討厭女星泉萍子助陣，睇到觀眾更加咬牙切齒。今次當然唔少得劇中嘅經典金句，米倉又有盡晒長腿，例牌有去浴場擺出四腳朝天嘅浸浴甫士。同時，今次《Doctor X》仲前往紐約取景，係同劇系列首次到海外拍攝。