林峯噚晚喺廣州國際體育演藝中心舉行《林峯Heart Attack 世界巡迴演唱會》廣州站。每次佢演唱會都見紅流血收場，今次都唔例外，喺綵排用嚟同觀眾近距離接觸嘅高空吊臂，鎅傷咗林峯隻手，佢話：「都慣晒，次次演唱會都一定有，唔見紅唔安樂咁。佢哋有叫過我用皮手套，但係要拉實個圈轉，太滑拉唔住，所以都係冇用，照頂硬上。」

佢已經有4年冇喺廣州開演唱會，場館只可以容納一萬人，但聽講噚晚就超額坐咗近萬三人。大會將林峯香港演唱會原汁原味帶到廣州，隨團人數有成180人，主要幫佢整呢個號稱廣州最大嘅四面台，除此之外再用過百萬整咗360太空吊臂，佢話：「我哋新加個太空吊臂，可以畀我喺場館上空360度高空飛轉，同觀眾近距離接觸，我都係第一次做演唱會覺得自己似拍緊超人戲咁，可以吊到咁高，飛到咁遠，又可以倒轉同下面嘅觀眾握手，其實幾好玩，但係我有畏高，被吊上去嗰一刻，我覺得都幾驚，觀眾應該都好開心，因為佢哋不停咁尖叫、狂叫，我喺上面都聽得一清二楚。」

為咗今次演唱會林峯花咗好長時間去操肌，所以唔少得就係有淋水濕身、撕衫騷肌嘅場面，真正符合演唱會「Heart Attack」嘅主題，唔少女歌迷睇到大叫。阿峯又話為咗最佳狀態，已經3、4個月冇啖好食，日日都係食蕃薯做代餐，所以巡迴演唱完咗之後，一定會食番夠本，狂飲香檳慶祝。