煲仔飯推介｜8間熱辣辣煲仔飯推介 外賣上門／人氣熱店／自取九折 寒流襲港必食！
蘋果日報 2021/02/04 17:17
編輯推介煲仔飯懶人包煲仔飯外賣
1.坤記煲仔小菜
地址：西營盤皇后大道西263號和益大廈地下1號舖
電話：2803 7209
營業時間：11am-2:30pm， 6pm-10:30pm
煲仔飯名店，於西營盤有新舊兩店，由兩兄弟分別打理，不少熟客始終覺得位於巷內的舊店風味較佳。
1985年開店，爐、米、豉油都有講究。早年以炭爐燒煲仔飯，現時不准用炭，所以改用火山石，火力猛，但易更燶，所以很考技巧。從固定米行入貨，用金鳳米，因舊米比較乾身，新米比較軟身，要控制口感，需要新舊米混合。豉油用日本萬字，加薑、葱頭，再配雞頭雞腳豬骨熬成的上湯，甜香不膩。
提供廿五款煲仔飯，都是白鱔、滑雞、油鴨、田雞等傳統組合，勝在新鮮，每天到街市入貨。飯焦薄薄一層，脆身香口，飯粒濕潤度剛好，不會過腍又不會太乾，淋上醬油後，飯粒吸引醬汁及配料的油香，熱騰騰的香氣一湧而上，是令人滿足的滋味。堅持即叫即煲，一煲臘味飯最快都要十五分鐘，每逢秋冬，入座後仍要起碼等一小時才有煲仔飯上枱，限聚令下雖然沒有堂食，但每晚六點後透過外賣平台送抵區內，由於太多人點菜，一樣要等候。
除了煲仔飯，豬骨煲、小炒等亦有不少人點，懂行的熟客，都會先點煲仔飯，再點豬骨煲或其他小炒，邊食邊等邊喝啤酒，最後以煲仔飯作結，所以來這兒，一定要多人才成。
2. 祥囍煲仔小廚
地址：筲箕灣愛民街6-28號新利大廈地下4A-5A號舖
電話：2343 8811
營業時間：星期一至日10am-11:30pm
隱身於筲箕灣後巷的祥囍煲仔小廚，開張六年，以往秋冬都晚晚爆場，最高峰每晚可以賣出二三百煲，現時因應限聚令，和多個外賣平台合作，在家亦能吃到，製作需時，最好提早起碼半小時至一小時點菜，每個煲多付$20按金，亦可以自取，每張單有九折。
十五款選擇，都是傳統款式，餸菜新鮮足料。招牌是鴛鴦鱔飯，黃鱔、白鱔都是每天由老闆親自挑選，只揀貴一倍的台灣貨，選貨講究，白鱔只揀魚皮銀白，吃來才帶脆；黃鱔不能貪大，斤半左右最彈牙。
火候準，飯滾收水，便下鱔魚，封蓋馬上放到炭爐上去煮，每煲煮約15分鐘，看着煲邊位置，見開始起焦便可以了，火候準。白鱔皮爽肉脆，黃鱔沒有一絲泥味，底下熱飯吸飽魚油，粒粒分明，香得過份，有滋有味，口腔像裹了一層鱔魚豐腴的膠質。而且用匙羹，可輕易反起飯底，起出一層金黃油潤的飯焦。
其他口味都做得出色，梅菜肉餅開胃而不死鹹；滑雞飯入口，飯粒有黃油香，雞肉滑身不嚡。整體有水準。
3. 大班樓
地址：中環九如坊 18 號地下
電話：2555 2202
營業時間：星期一至日12nn--6pm
作為排名四十一位的世界五十大最佳餐廳（The World’s 50 Best Restaurants 2019），更是亞洲區唯一上榜的中菜館，去年秋冬也首推煲仔飯，為了隆重其事，老闆前年末已跟大廚回中山，看村中長輩如何煲飯，務求烹調出最完美的煲仔飯。
招牌是臘味番薯煲仔飯。兩條肥厚的臘五花，是餐廳每年十一月起，於上水自家農場生曬風乾而來，只以老抽、生抽、糖以及玫瑰露醃製，曬也有學問，除了要避開露水濕氣，又要做好防蟲，通常只曬四至五日，既有臘製香氣，裏面又保有肉汁。風乾後再以茶葉、菊花等來煙燻，味道更具農村氣息。
爐具亦有講究，餐廳以不鏽鋼訂製一如同刀鋸美人表演魔術箱的長形鐵爐。鐵爐四面密封，底下放瓦斯爐，另砌上紅磚圍邊，模擬鄉村爐頭的存熱反應。醇香化口帶肌理肉汁的肥臘肉，配上吸盡臘味油，口感粉糯綿滑的番薯，拌着熱騰騰，米香撲鼻的豉油撈飯，煲底的金黃飯焦，均勻地鋪滿一粒米厚度，雖然每人要起碼百多元(煲仔飯以位計算)，但還是值得一試。其他選擇還有豆豉銀魚排骨飯、梅乾菜扣肉煲仔飯、榨菜牛頸脊煲仔飯，選擇不多。
4. 榮記茶餐室
地址：慈雲山毓華里 12號地下A-B舖
電話：2328 9232
營業時間：星期一至六6:30am-9:30pm，星期日及公眾假期 6:30am-5:30pm
近來以煲仔沙嗲牛肉麵成名，午間大排長龍，但這間茶餐廳從四年前開始，太子爺接手後，其實以新派煲仔飯聞名。
除了十六款傳統配料，如豉汁排骨、窩蛋肉片、北菇滑雞，最受歡迎就是一系列新派煲仔飯，如加入芝士製作的邪惡芝士煲仔飯，煲仔飯表面淋上半融芝士，鹹鮮肥香；或四川麻辣煲仔飯，麻香少辣，相當刺激；因老闆家族出身流浮山，所以有門路取得靚金蠔及銀魚，並以此配蝦乾來做煲飯仔，蝦乾不死實，金蠔飽滿半乾濕，還下了麻油、葱花，雖然每煲要近一百五十元，還是有不少捧場客。
5. 嚐囍煲仔小菜
地址：西環北街25號地下
電話：2819 6190
營業時間：星期一至日11am-3pm；6pm-10:30pm
開業十年，有煲仔飯名店坤記前師傅坐鎮，連續兩年被列入米芝蓮推介。提供三十多款選擇，有新派日式鰻魚飯、鹹魚鮮肉牛肉飯，去年甚至推出蛋糕煲仔飯，別有創意。
但別誤會一味新派，傳統款式亦做得穩當。先說飯，新米取其香，舊米求口感，比例恰到好處，以火山石爐取代炭爐，預熱後能穩定發熱，讓師傅有更大發揮。配料如田雞、黃鱔亦選得出色，夠新鮮，醬油鹹淡適中，整體有水準。現時因疫情，只提供外賣自取，每煲按金$20。
6. 光榮冰室
地址：尖沙嘴厚福街5-6號地下6號舖
電話：2422 6555
營業時間：星期一至日 7am-10:30pm
近年因黃店立場而備受矚目的光榮冰室，其實當年開店時，這間懷舊裝修的茶餐廳以煲仔飯聞名，一入冬天就有人排隊，標榜以生米開始煲起，因此起碼要十多分鐘甚至半小時才能吃到煲仔飯，飯粒入口乾爽，飯焦脆而不過燶。
共十款配料，都是傳統口味，油鴨髀、豉汁排骨、鹹魚肉餅、薑葱鯇魚等，配料足料，立味油分足，排骨無雪味，醬油鹹中帶甜，相當惹味，一碗份量要六十八至七十二元，份量足夠二人分享。
荃灣、尖沙嘴、旺角及銅鑼灣分店都提供外賣煲仔飯，每個煲加$8，只限自取。
7. 江湖小棧
地址：荃灣鱟地坊 30號寶成大廈 01地舖
電話：2399 7994
營業時間：6pm-2am
荃灣區內的人氣小店，開業5年都仍然大排長龍，秋冬往往要排半小時才能入座。
有煲仔飯、煲仔菜及煲仔粥供應，但煲仔飯是主角，一來組合多，除了固定的十多款款式，還可從十多款配料、醬料中自由組合；二來口味特別，特別是醬料，有馬拉盞、蝦膏、麵醬、欖角等選擇；最後就是自家煉製的豬油，每隔三四天，老闆就早早回來，把豬肉檔交來，豬腩下的大肥膏切件、汆水(辟臊味及減少水分)、沖洗、燒紅鑊，最後加薑洋葱及肥膏，慢慢煉煮豬油。當煲仔飯上枱後，侍應會把醬油及豬油同時奉上給客人，讓客人自己淋在飯上，被熱力一逼，滿室都是香噴噴的油香，是終極美味。
江湖小棧又以武俠小說為裝修主題，牆壁掛滿仿真兵器，連餐牌都是武俠秘笈設計，加上一系列串燒及啤酒，每晚都非常熱鬧。暫時晚上六時後提供外賣，店方以鍚紙包裹煮好的煲仔飯，半小時後仍然熱辣辣，醬油及豬油就會放在小膠兜中，讓客人回家後再倒在飯上，跟堂食相差不遠。
8. 嚐喜大不同
地址：北角七姊妹道 25-31號嘉蘭大廈地下 C舖
電話：2833 6968
營業時間：7am-11pm
位於北角的嚐喜大不同一向以煲仔飯聞名，早年以炭爐為賣點，雖然因牌照問題而未能繼續供應，但煲仔飯仍然出色。
提供廿多款煲仔飯，都是常見的滑雞、鹹魚肉餅、窩蛋牛肉、黃鱔、田雞等，但用料新鮮，以滑雞為例，肥美有黃油，卻沒有令飯粒濕糊，鹹魚肉餅鹹魚亦霉香而不過鹹。
飯底煮得出色，師傅燒得穩妥，點任何煲仔飯，嘗起來飯粒分明，不會過硬或太焦，飯焦超班，刮刮刮，不止香脆，更像吃鍋巴般，米香出奇濃郁。如果和師傅交情足夠，可以請師傅示範鍋巴做法，煲仔飯上枱時，客人可以連飯連焦和配料起出，像個鍋巴砂鍋，是已成絕響的奇技。
因應限聚令，最近提供外賣自取，每個煲仔按金$20。小店還有鑊氣小炒、點心等選擇，但做得最好，終究是煲仔飯。
採訪、攝影：《飲食男女》
-----------------------------
《飲食男女》首度推出「新年禮包」，嚴選12間香港小店優質食品，更包送貨。送禮自用，撐香港好貨，立即按此購買！
-----------------------------
免費推廣小店，《蘋果》18區分區小廣告，立即按此登記！
-----------------------------
工作辛勞想食餐好？《飲食男女》每日為大家示範三餸一湯！
-----------------------------
《飲食男女》全新酒鬼專用Facebook Group「酒鬼男女」，立即加入！
-----------------------------
《蘋果》英文版免費試睇：了解更多