屋企養咗5隻名貴藏獒嘅黃貫中（Paul），噚日喺微博貼出老婆朱茵同愛犬沙展嘅合照，話之前帶咗沙展剝牙，但打完麻醉藥冇耐沙展就已經醒番，醫生仲打算放棄，令阿Paul忍唔住出手：「我二話不說，把手術夾搶過來，一手把牙床也拉出來。護士暈了。我也怕血，但為了我愛的，我不會退縮。」

「唔係第一次」

網民指藏獒驍勇善戰，阿Paul回覆：「專咬手嘴和嘴，三角頭，非常重嘴又死口，而且不知痛，他用了70分钟，把酋長（Paul另一隻藏獒）征服，血流成河，但酋長令其他三隻也重傷了。這就是獅虎藏獒的可貴之處……沙展能嗅出和我有血緣的人，其他的人只要可疑，一定咬。」記者致電阿Paul，佢透過短訊回覆：「冇事，我都唔係第一次做刀手。」問沙展係咪有爛牙要剝？佢話：「真係有隻牙爛了，但我沙展四分一時間就醒了，嚇死所有人。」網友讚佢勇敢，佢只答：「獸醫話未見過不怕麻醉的狗，我惟有頂硬上。」
噚日馮仁昭就搵獸醫黎昌生問下，佢話：「無論你幾大隻動物，麻醉藥只要份量啱，中血管就百發百中，估計係打唔中先有呢個情況。」
撰文：馮仁昭