日本歌手工藤靜香出道30周年，佢剛推出全新個人專輯《凜》，碟中收錄9首全新歌曲及37首經典MV作品，除咗靜香原用「愛繪理」之名包辦填詞之外，今次仲請來殿堂級音樂人包括玉置浩二、岸谷香（奧居香）、B'z結他手松本孝弘等為靜香寫歌，當中松本孝弘為佢創作嘅《蜜與棘》最受注目。

靜香繼上月亮相富士電視台特備節目《FNS夏日歌謠祭》後，日前開始為電台主持個人節目《All NIght Nippon》，本月14日又將接受NHK音樂節目《SONGS》訪問，當然少不了演唱新歌舊作。及至12月7日，靜香又會舉行聖誕Dinner Show，門票每張盛惠4萬日圓。

靜香同老公木村拓哉都係滑浪發燒友，靜香最近為宣傳新碟，接受訪問就自爆曾於夏威夷學滑浪時被大浪擊中，面部撞向滑浪板，結果搞到鼻樑骨折，連牙都崩埋，由於受傷嘅兩日後要趕返日本亮相音樂節目，結果佢喺鏡頭前惟有強顏歡笑，更唔敢擘大口讓崩牙look曝露人前。