外號盃王的練馬師大摩今日（17日）在沙田雖冇捧盃，但密食當三番，繼第一、八場分別勝出「妙力之城」及「駿皇綵」後，最尾第十場三班1400米由潘頓贏「新力威」埋齋中三元。「新力威」單Win及組合獨贏A3分別派269.5及26.5元，大摩榮膺今年復活節賽馬日之王。

由冠忠巴士老闆黃良柏持有的「新力威」，之前在港五戰零獎金，三次跑十名以外，呢次換上潘頓再跑1400米，人馬首度合作即有火花，沿途守第八位，末段於外欄越衝越行，就此贏半馬位，在港首次上名即爆26倍Win開齋。

大摩表示十分開心，因為「新力威」馬主黃良柏剛周日（16日）娶新抱，翌日即贏馬，可謂雙喜臨門。

今場53倍大冷門「天合」後上第二，搭頭馬「新力威」連贏派5,173元。第三名大熱門「世界紀錄」，第四名為「嬴風雲」，四重彩47萬幾係全日最冷。

大摩中三元，潘頓這天亦執兩Win一熱一冷，分別為第七場「老友威威」及第十場「新力威」，佢最終更以40分連續第二次賽事勝出騎師王。

尾場幾乎再有騎師直路墮馬，華將吳嘉晉騎姚本輝馬房「新疆紡」於外叠被擠壓至嚴重勒避，佢當時嚴重失平衡，身體搖搖欲墜，猶幸抽得實韁繩，令座騎恢復步韻化險為夷。