曾一台獨大的TVB，昨日宣佈曾志偉和王祖藍即將回巢，曾志偉將擔任TVB副總經理兼行政委員會特別顧問，王祖藍則擔任首席創意官，消息一出，引起各界譁然，同時亦引發TVB疑似內鬥的揣測。曾在TVB擔任總經理的陳志雲，今日在其YouTube頻道《時事短評》中談及曾志偉回巢，指一開始得知消息後「我第一時間真係以為係惡搞新聞」；志雲以「濕水欖核」來形容志偉，指他「坐唔定」，但並非質疑對方未能勝任，認為志偉的人脈相當廣闊，製作經驗豐富，能否挽回TVB收視頹勢仍是未知之數，但至少他可以團結和振奮一班TVB同事。

志雲大爆兩、三年前曾問過志偉，為何不返回TVB？志雲說︰「佢曾經表示過唔返去嘅原因，就係而家嘅TVB，已經唔係我哋認識嘅TVB。我相信佢今次返去係有實際嘅把握同權力，嘗試為觀眾搵返大家熟悉嘅TVB。」他更為志偉講好話，指撇開對方政治立場，志偉是個真心關懷朋友的人，在自己最艱難的日子中（捲入涉貪案），曾獲對方支持和信任，令他永遠不會忘記。

志偉回巢掀起TVB內鬥最引人熱話，志雲在節目中說︰「樂易玲係咪得勢？余詠珊係咪失勢？相信短期內另一個談論焦點可能落喺何哲圖（星夢娛樂行政總裁、余詠珊老公）身上。」其實早年曾傳助理總經理（非戲劇製作）余詠珊於2013年港姐競選時，志偉曾寸爆她改革賽制和現場live變錄影，而今次志偉回歸，更空降成為余詠珊的上司，引起內鬥傳聞。對於曾志偉回歸，昨日余詠珊向傳媒表示志偉是她的師傅，更強調自己不會辭職。

不過志雲就分析︰「因為Herman正正就係余詠珊嘅另一半，不過呢啲都係低層次嘅話題，圈中人開始評論真正失勢嘅會唔會係而家TVB董事局副主席兼行政總裁李寶安呢？因為江湖傳聞，志偉唔願意回巢係因為李寶安嘅。」看來這台戲比睇劇更精彩。

節目後半部份，志雲談及已延期一年的東京奧運，因武漢肺炎疫情持續，今年的東京奧運會否因而再度取消，對日本將是一個財政的大災難，志雲更將TVB高層變動，跟東京奧運以「得失」來作總結，他說︰「無論細到如TVB局中人抑或大如日本一個國家都好，我所領會到嘅道理就係：勿以得為樂，勿以失為憂，一日未到最後一刻，都好難知道究竟你今天所得嘅，會不會係你明日所失嘅。得失，『得失』呢兩個字擺埋一齊係好有意思，有得必有所失，一切都是生命嘅必然。聚散係彼此嘅虧欠，有聚就會有散，你可以話係命運嘅成全，無論你嘅人生係點都好，其實走開自己嘅路一定冇錯，做好你自己應該做嘅事，亦都一定冇錯。凡事我哋努力盡心去做好咗，其他真係交畀上天，係你嘅，永遠都係你嘅，唔使爭，唔係你嘅，終於要失去，何必要爭；屬於你嘅邊個都搶唔走，但唔屬於你嘅留都留唔住。」志雲跟李寶安當年一直傳不和，二人曾在六嬸方逸華面前爭寵，而消息指當年志雲捲入涉貪案，是因為李寶安頂證，二人被傳是死敵，志雲此番「得失論」，明顯是有所指。

-----------------------------

《蘋果》英文版免費試睇：了解更多

英文版已登錄《蘋果》App，立即下載/ 更新：iOS / Android

-----------------------------

支持蘋果深度報道，深入社區，踢爆權貴，即Like蘋果專題及調查組FB專頁！