【外套成萬蚊】天生購物狂 馬天佑︰我係一個精明消費者
馬天佑購物狂余德丞全民造星
馬天佑今日連走兩場,先後到商台及新城電台宣傳自己編曲、作曲同監製嘅新歌《購物狂?》,佢話好多朋友指佢係購物狂,馬天佑澄清︰「其實我係一個精明消費者,我唔會買車、紅酒、古董,我唔會買奢侈品,只係買吓化妝品、飾物同跳舞衫,都係啲消耗品,男人同女人嘅消費角度唔同,女人會覺得買一個名貴手袋係保值,好多男性朋友唔明,寧願攞啲錢嚟交租。」佢仲話平時會上網不停格價買機票、酒店,佢話︰「我嘅強項係買電器、衫同護膚品,我會知道邊度買得最平,好多人都問我攞料。」
自從擔任形象指導需要不時幫藝人、客人購物後,佢直言已經滿足晒自己所有購物慾,所以近年已經好少購物。講到買最貴嘅一件衫,佢話︰「喺入行之後一、兩年,用咗萬幾蚊一件外套,我喺outlet度買,已經係原價嘅兩三折,所以我係一個好精明嘅消費者。」馬天佑指自己唔識投資,所以好少花錢投放喺股票同物業上。
講到好友余德丞(Dickson)已經出院,佢日前曾經探過對方,佢話Dickson精神好好,好快可以復工。馬天佑做《全民造星》嘅導師,忙於準備下月14日嘅決賽,佢話︰「今次同埋一班參賽者一齊表演好開心,感覺到佢哋嘅活力。」完成拍攝後,馬天佑表示會飛到巴黎出席時裝周。
精選娛聞,喺晒《娛果》
http://fb.com/appledailyent