政府威迫利誘市民用「安心出行」，聲稱截至周二（16日）已有逾84萬下載。 香港 7百幾萬人，根據政府統計處去年3月嘅調查，都有597萬人有智能手機。「安心出行」仲未破百萬大關，如果用政府嘅語言偽術嚟講，可以話「仲有好大進步空間」、「可以做得更好」之類。正如封區強制檢測大龍鳳接二連三捧蛋，政務司司長張建宗都可以形容為「符合小區清零目標」。

資訊科技總監辦公室（資科辦）同日出咗份新聞稿，今次唔係硬sell，而係「提醒」，提醒市民近日有網站偽冒「安心出行」app，該網站聲稱已將程式改寫供市民下載，其實係假嘢喎。

由於八方對於「安心出行」始終唔係幾安心，所以對於真假app都唔係太上心，不過政府就千方百計谷市民的下載使用，聲言安心出行流動應用程式無須用戶登記，係「無大台」嘅！官方「無大台」嘅英文咁寫：There is no central system to record the data。

香港人 過去兩年最深刻嘅事，就係社運進化到「無大台」境界，八方就唔相信特區政府都咁犀利進化到無大台，況且政府本身係最大嘅台，出一個app點可能「無大台」？

慢必陳志全都話如果「無大台」之說係真嘅話，咁個App仲簡單過登記個人資料同電話，「你問我信唔信，我當然存疑啦。當我哋政府無信用嘅時候，就乜嘢都要懷疑㗎啦。」

他指新加坡政府亦有前科，話當地嘅「安心出行」除有防疫追蹤之外，仲有「副作用」，就係捉賊或者曾於案發現場出現過嘅人，「新加坡亦都唔介意話俾你聽有呢個功能存在」。

至於香港「安心出行」有無呢個「副作用」呢？慢必話唔敢講，但提醒大家，一句「保安理由」，政府就做乜都得。

-----------------------------

《蘋果》英文版免費試睇： 了解更多

英文版已登錄《蘋果》App，立即 下載/ 更新 ： iOS / Android

-----------------------------

支持蘋果深度報道，深入社區，踢爆權貴，即Like 蘋果專題及調查組FB專頁