上期講到，友人設定了恐慌性撈底價15,000點，視為下次入市機會。當然每個人都有權諗嘢諗到極端悲觀或極端樂觀，但要極端劇本成為整個市場嘅主流想法，機會必然偏低。

就算畀你今次估中，下次你好容易又將極端主義套用喺分析，極端分析連中兩次三次嘅機會係低中之低中之低，最終都係錯。統計嘅重要性，就係將未來九十幾萬個可能性，設定喺合理範圍裡面，令你知道估值高，通常會高到乜嘢水平；估值低，又通常低到乜嘢水平。就算講技術分析，大概都係統計學同心理學等等嘅集結，盡量畀你一個機會大於50%嘅預測。

Roll over到19年3月底，恒指市賬率1.15倍左右，接近過去30年下限1倍水平，反映唔少負面因素，當然前提係中港樓價冇爆煲而沒令上市公司賬面值下跌，令預測估值拉升。

呢個時候冇水晶球話畀你聽中港樓市會唔會爆，不妨先反問自己：「如果中美紛爭玩咗大半年、港股跌接近一年、美股都開始大跌，同時大陸經濟、樓市表現差而未至爆煲狀況，CCL由高位跌8%，咁中港樓市進一步轉差、即爆機會有幾大？」

答案由各位自行選擇，小弟個人就先假設一兩年內冇樓災嘅劇本。

晉佳
https://www.facebook.com/advanceguy1/

investMAN
For People of Style & Substance
掌握理財智慧 感受生活品味
http://facebook.com/investMAN.hk