今次（3日）沙田賽事以泥地為主，共編七草三泥。練馬師沈集成共派五駒出爭泥地賽，當中「按得澄」、「理想回報」及「貨如輪轉」均強配潘頓執韁，以馬房作風必定有心出擊。

翻查紀錄，沈集成今季九次派馬角逐泥地賽，當中四次由潘頓執韁，取得兩冠兩亞全入Q，反而其餘五次用其他騎師只獲一席季軍，證明沈集成搵得潘頓跑泥地必定有計。

機會最佳首推第六場三班1650米泥地賽的「理想回報」，此駒今季三次配潘頓均跑谷草，只以1.25至2.25馬位落敗，屢拼不逞下，轉往泥地一試可以理解，潘頓肯執韁反映唔服氣未死心，出埋王牌報名，肯定有心求交代，抽2檔更是可提供機會。

第八場四班1650米泥地賽，「貨如輪轉」加眼罩後連仗追近，近兩仗更交出全場最快末段締速，包括上仗初跑泥地獲季軍，相信已試準。至於第二場四班泥地1200米之「按得澄」上仗初降入四班即首次入位，證明有班利，改由潘頓接手必搏甩髀。