唔少人鍾意用新銀紙封利是,但由二○○六年開始,金管局已經提倡銀行用「迎新鈔」,即係保存十分良好嘅舊鈔,今年三間銀行提供嘅銀紙,有成45%係迎新鈔,證明大家都開始習慣用,環保吖嘛。
年年換新銀紙嗰朝,銀行都會排長龍,唔少都係婆仔。費清問吓婆仔同事林C9,使唔使晨咁早去排隊,但佢話自己未雨綢繆,早喺三個月前,已經將新淨嘅銀紙留起,儲儲吓,𠵱家淨係廿蚊紙都有逾百張。
佢阿媽仲醒,每逢過年後都會向啲仔女「回收」利是,唔係獨吞,而係真金白銀換㗎,「如果夾埋有千幾蚊嘅,阿媽咪畀番千幾蚊我哋囉」,而佢阿媽就留起回收番嚟嘅廿蚊紙、五十蚊紙,下年用嚟封利是。
費清好環保,收利是,唔使一定要新鈔,大封就得㗎喇。收到呀呵,林C9。