上個禮拜同事才子結婚,平時超怕熱嘅同事文文,着咗條紫紅色麻質嘅吊帶短裙去飲,仲好醒咁加咗個淡紫色tubetop打底防走光,啲同事平時見慣佢返工個「賣魚look」,都讚佢嗰日着得好睇,𠱁到佢鬼咁開心,周圍捉住啲人影相,又擺出港女招牌V字手勢,好鬼風騷。
過咗幾日,個衰妹好緊張咁打電話嚟畀我,話當晚揸住部單鏡反光機狂影佢相嘅同事郁郁,鹹鹹濕濕好鬼馬同佢講:「唔知點解影到你條裙變咗透視呀,真係唔好意思嘞。我send返啲相畀你睇。」文文話即刻返屋企睇吓自己部機影啲相有冇事啦,發現全部用咗閃燈嘅相都影到佢條裙變咗seethrough,「上身有tubetop打底都透唔晒,下身就現晒形。最慘出咗事都唔知點解。」