民主派五君子闖關,中方接待馮檢基、麥國風、黃成智等三人,涂謹申及何秀蘭未過華界就退貨,不過回鄉證得保不失,講到明係今日上嚟做騷唔入得,日後再上嚟,玩冰火揼骨,或者光顧牛郎K店,國家都重係無任歡迎,證明中方玩嘢拆招,段數真係高咗。黃麥基等三人,喺深圳由一名叫李飛嘅中國籍男子接頭,任憑三人大吵大鬧,重有茶點招待,毋須畀錢㖭。
為下一次闖關留下空間
涂謹申何秀蘭打回頭,涂謹申衰邊科?就梗係因為上次同媽田拍住上,去到華府,榮獲國務卿鮑威爾接待,盡顯「中國人的光輝」,而阿何秀蘭,就同大姐卿金蘭姊妹,楊森同劉慧卿亦陪同過羅湖,俾人「的」咗入房後,跟住再無罪釋放。國家一手軟,一手硬,道門冇閂到實一實,咁即是話為下次闖關,留下空間,胡溫新班子以民為本,係唔同啲嘅。
最新失業率公布,百分之七點二,經濟衰退,都重未有起色,倒不如國家真係放晒合資格嘅一億五千萬人來港,叫佢哋喺彌敦道一人吐一篤口水,然後按照清潔條例,位位罰款一千五百,加加埋就有現金二千二百幾億,全部撥歸庫房,就更加直接。
維港匯個審計報告出咗,矛頭直指殖民地餘孽盧維思,有啲親中人士,好想佢辭職。不過阿盧娶咗中國老婆,用行動表示愛國,跟住放棄英國護照,轉攞中國籍,呢一項創舉,證明中國嘅綜合國力真係好強,就算經佢手散足一億,八方都認為其實係好抵。唔怪得盧維思好似睇穿咗特區政府呢張底牌,印印腳繼續歎雪茄。
維港匯一炮一億,放一個煙花,咁就冇咗,猶如俾人兜面摑咗一巴,痛一陣,就冇事。不過審計署報告爆咗另一樣,特區政府為所謂科研發展提供資助嘅基金,投資嚴重虧損近二億五千萬,相當於兩個半維港匯。原來呢個基金,投資咗五十個項目,其中十八項嚴重虧損,lam咗政府一浸膏油,。