黃翠如原本只係大台芸芸花旦之中嘅其中之一位，佢仲有位男友叫蕭正楠，黃翠如平時主要都係出現喺報紙嘅娛樂版，不過喺今年四月佢失驚無神喺財經版現身，原來佢做咗上市公司嘅千金。

翠如爸黃永華有分嘅公司聯旺集團喺今年4月12日喺港交所創業版上市，當時個配股價只係0.26港元，而上市當日股價最高見4.8元，勁升十幾倍！以後咁就夠晒勁？小子你太年輕了！

上市到o依家已經超過半年，而聯旺嘅股價都keep住升勢強勁，截至噚日收市報16.8元，對比配股價勁升近65倍。據港交所資料顯示，o依家聯旺集團市值209.664億，而黃永華拎有公司37.5%股份，計翻都有成78.6億港元，咁翠如BB咪名符其實「78億千金」！