美國拯救汽車業方案竟然在參議院「撻Q」，未能達成共識，呢一「撻」，真係令全球股市「撻」到攤攤腰！港股裂口低開之後，一度重挫1100點，至下半場跌幅才略見收窄，但都要跌855點或5.5%，收報14758。
昨日本欄話好多散戶見港股累升太多，開始敢造淡，炒熊證之類，點知個市真係來一記急插，呢鋪散戶真係醒。股海卧虎藏龍，唔到你唔服。家陣港股後市真係「兩睇」，最簡單一派睇短期反彈見頂，另一派較樂觀，認為恒指仍企上升軌，回氣完成就會再升。

10日線有支持

由於今年跌浪特別冗長，故此星俠以為港股今次反彈應無咁短癮，如果認為後市跌完再升，之前錯過升浪的散戶可趁股份回吐之際吸納，其中內地股市近期已算回穩不少，可留意光大控股（165）。
光控持有光大銀行及光大證券，內地股市最壞情況暫見扭轉，有助光控分拆上述兩大業務於A股市場掛牌；另外，下周一光大銀行將再發債50億元人民幣，此舉可提升光銀資本充足比率，亦有助加快上市。
光控昨隨大市回落，惟跌至10日線水平已見支持，收市跌8.8%，報9.50元，可伺機上車，目標12.30元，夠晒水位，失守8.60元止蝕。
方星俠