早輪消委會測試巿面嘅16款MP3、PMP，其中一半樣本，最高音量輸出超過100分貝嘅限制，長期咁聽會傷害聽力。小藍都遇到咁嘅問題，香港人多車多，出街、搭地鐵四圍嘈到拆天，開住部隨身聽都不經不覺調高音量。
噚日Sony嘅老友Fiona打電話畀小藍，佢哋喺下月開賣嘅全新WalkmanNWZ-S745針對嘈吵環境，具備強化消除雜音系統，有效減低90%嘅環境雜音，再加埋部機嘅數碼音質提升處理器（DSEE）、清晰立體聲功能、清晰重低音功能等，用家唔使提高部機聲量都可以享受清晰悅耳嘅音樂，聽覺就唔會受損啦。

可播片及學習語言

Fiona又話，部機另一賣點係電池壽命特長，叉一次電，可以播放達42小時音樂或10小時影片。加上配備全新嘅語言學習模式，可以重複播放指定段落，同控制播放速度，好似比正常速度慢一半或快兩倍，又唔會影響音調，方便用戶學習正統發音，「用家聽歌睇片之餘，可以學埋語言，一物多用，賣1,798蚊。」
家啲影音產品乜都講多功能，潮流連鎖店JCShop老闆Alan話，啱啱引入韓國品牌EZIOZ1，集手錶、三頻電話、PMP於一身，加埋1.8吋觸控性顯示屏，型到爆燈，「跟機A2DP立體聲藍芽耳機，啲聲超立體感，賣1,380蚊。」