以台灣政壇奇女子璩美鳳為藍本的電影《偷窺無罪》前晚首映，女主角麥家琪、任港秀及林雅詩都盛裝出席。雖然男主角吳彥祖因要開工而缺席，但三位女演員則博到盡，各自穿上低胸衫或透視裝赴會，而任港秀身穿的一襲低V露臍T恤，謀殺記者最多菲林，成功搶去第一女主角麥家琪的風頭。
見公仔怕怕
麥家琪前晚到場時，見到大會安排的一隻避孕套公仔，已顯得頗為避忌，她說：「呢啲乜嚟㗎？我唔會企過去㗎！」其後避孕套公仔主動走近麥家琪身邊，她更說：「唔好行埋嚟吖，我好驚咁大隻公仔。」問她是否嫌棄避孕套公仔時，麥家琪說：「我唔知佢係乜嘢嚟㗎，淨係見到一嚿嘢，咪唔敢行埋去咯！」
其後記者邀請麥家琪與任港秀合照，未知是否因任港秀的低胸裝盡搶風頭關係，麥家琪在合照時顯得很拘謹，笑容亦見牽強，不過當她與林雅詩合照，則笑容滿面兼手拖手。事後問麥家琪是否不滿任港秀搶鏡，她語帶醋意地說：「佢靚啲吖嘛！」
兩邊黐膠紙
對於自己的衣着搶盡風頭，任港秀說：「我冇呢個意思，件衫都唔係好性感啫，況且我做足安全措施，兩邊黐晒膠紙，着性感衫係為咗影吓相！」
最近有報道指吳彥祖的fans投訴偶像不應拍《偷》片，對此麥家琪說：「我冇睇過呢單新聞喎。」她表示不擔心觀眾會以色情眼光去看這套電影。
採訪：魯萍
攝影：何國豪