當年今日
關於我們

【靠口碑】《詭探》得2點?邵仲衡唔信收視報告﹕落廣告嘅Agent都唔睇

蘋果日報 2017/06/05 19:55

邵仲衡蘭花刼詭探

無綫一台獨大,似乎對其餘兩間電視台ViuTV同奇妙電視視而不見,所以黃金時段大膽播出10年前舊劇《蘭花刼》,挑戰觀眾底線,但結果首周播出收視平均只得17.3點(約112萬觀眾),成為史上首周收視新低。
反而,ViuTV嘅《詭探》由開拍到播映一直令網民好期待,見到《蘭花刼》滑鐵爐,大家對《詭探》或許存有一絲希望,盼奇蹟出現。ViuTV公關就話唔會對外公布收視,據悉ViuTV節目平均收視同昔日亞視差唔多,徘徊喺0.5至1點收視,但據聞《詭探》平均有2點(約13萬觀眾),最高有2.3點(約15萬觀眾),以ViuTV自製劇而言,成績算係咁。
邵仲衡今日接受《蘋果》電話訪問就話完全唔理收視,佢話﹕「o依家個世界睇apps架啦,呢個台係針對年青人。問心嗰句,唔覺係得2點,因為舊式嘅計算方法,都係得個盒仔,計千幾部電視,我識啲落廣告嘅agent都唔睇呢啲(數字)。」邵仲衡話冇睇《蘭花刼》,所以不便評論,但開心見網上留言讚多過彈,佢話﹕「我上facebook睇留言,最多講話唔夠喉,另外一半就話喜歡、鍾意、好特別,相信嚟緊第二個星期會有新氣象。」
講咁耐,仲有奇妙電視呢?周一至周五同樣喺9點半黃金時段,奇妙係播緊韓劇《浪漫醫生金師傅》,睇邊套?你自己揀。