鬼后許瑋甯同岑日珈今晚喺荷里活廣場出席《紅衣小女孩2》首映禮，瑋甯身穿超低胸兼大露背裙現身，大派福利，但佢就不時用手遮胸，非常小心。瑋甯話：「已做足安全措施，確定要安全。」

《紅》片喺台灣票房超過2,500萬，成績咁好，導演程偉豪已經諗定慶功，佢笑謂：「片中有位神秘演員小鮮肉虎爺（吳念軒），他會在慶功上裸爬。」

！！！！

程偉豪仲話，希望香港票房成績好過第一集，咁香港會點搞慶功呢？會唔會搵瑋甯裸爬？佢哋就大笑話唔會，瑋甯就話會表演吊威吔。咁瑋甯有冇信心憑本片摘金馬影后？佢就話：「希望，這次很用力去演，角色很好，大家也拍得很辛苦。」

今次為咗拍呢個精神崩潰嘅角色，瑋甯用咗差不多一年時間抽離：「拍的時候也覺得頻臨崩潰，真是不容易詮釋的角色，在家照鏡的時候也不知自己是誰，用了快一年的時間才能抽離。」幸好身邊有朋友幫助，陪佢出去玩放鬆心情咋。

講到拍檔楊丞琳早前喺男友李榮浩演唱會時放閃，瑋甯話：「很好呀，很甜密。」想唔想老友快啲結婚？佢就話：「結婚是他們的決定，希望她幸福，我不會push她，開心就好了，她看起來很開心。」至於已經單身3年嘅瑋甯，直認唔覺得dry，仲話依然未打算拍拖，又話冇人追，現時佢專注事業，因為工作太忙，如果拍拖就會對另一半唔公平咁話。