盧凱彤（Ellen）上月5日在香港島跑馬地寓所墮樓身亡，她離世前一日為ViuTV擔任評判的節目《全民造星》，上周五晚開始播出。

在今晚節目中，龍志權的A2組與梁業（肥仔）的B2組進行唱歌及跳舞對決，其中唱歌部份，兩組跟小肥一起合唱《內外》，而這首歌，正正是Ellen作曲，藍奕邦作詞。

Ellen與其他評判李幸倪（Gin Lee）細心看着一眾參賽者及小肥演唱自己作品，不時笑笑口看得相當投入。之後Ellen給予評語時更表情多多說：「我係覺得睇得好開心嘅真係，但我知道大家唔係想搞笑嘅，但係唱功嗰方面，其實雙方都唱得好投入，但我覺得A組嘅同學畀我感覺係純熟啲，對於自己唱緊嘅嘢係乜嘢，譬如表達情感係乜嘢，我會覺得有感覺啲。」

接着Ellen對肥仔說：「我記得你第一句solo唱嘅歌，你第一粒音係fade fade哋嘅，咁可能要喺嗰方面再加油，因為你係會備受注目㗎。尤其是呢種比賽裡邊，大家係會想睇死你㗎，所以你更加要努力，喺你做solo嘅嘢嘅時候。」肥仔聽到之後點頭示意明白。Ellen跟Gin Lee等評判給予參賽者的評語都相當實際及到point，絕對不是之前蕭定一等人問「個名好普通」如此簡單。

之後A2組與B2組兩隊跳舞比拼，Ellen睇得更開心，不時笑到四萬咁口。兩隊跳完舞後，主持強尼問Ellen是否enjoy，Ellen說：「Enjoy呀！Enjoy呀！好開心呀睇到！我想講呢…我知道A組係好辛苦嘅，亦都應該排咗好耐嘅，但係呢，我唔覺得係跳舞嘅，頭先你哋做嘅嘢，咁所以呢，B組又真係跳得好好，唔係淨係肥仔跳得好㗎，其他人都跳得好好，而肥仔…」

此時Ellen深深的呼了一口氣，然後笑說：「我同林二汶（at17）入行嘅時候，林二汶同你嘅磅數應該差唔多，我哋曾經喺商場唱歌，下邊有fans大嗌：『豬扒！』咁樣嘅，跟住我哋就話：『多謝！』跟住就繼續唱，我希望你真係可以入行，做歌手、做明星，跳舞。」在現場人士聽到這番鼓勵說話後齊齊為肥仔拍手歡呼，而跳舞跳到面紅耳熱及滿面大汗的肥仔，亦笑住向Ellen鞠躬說：「多謝！多謝！」不過，據悉最後評判兩項比賽加起來的分數，肥仔的B2組最終落敗，肥仔得以留低，但跟肥仔同組的隊友如何啟華（阿Dee）及嚴瀚褀（嚴褀）等，均被叮出局。

精選娛聞，喺晒《娛果》
http://fb.com/appledailyent