朱慧珊、劉錫賢等一班亞視舊將，今日下晝去到北角新光戲院出席《A記情友可緣慈善演唱會》記者會，演出將會喺九月舉行，而且同慈善機構合作，收益扣除成本後會捐俾低收入家庭。

問到朱慧珊到時會演出啲咩？佢話：「我會唱歌，雖然呢樣唔係我強項，但呢個演唱會係集體回憶，希望大家唔好介意我唱得唔好，其實有年亞視台慶我都有唱過歌，嗰次唱《問我》，今次都想唱《問我》，但要等大會決定，唱歌難唔到我。」珊姐又透露原來佢以前跟過戴思聰老師學唱歌，佢話:「學咗一、兩年，嗰時乜都會學，o依家諗番，都有少少後悔冇做歌星。」

至於劉錫賢就話當晚會負責唱歌同做戲，佢話:「呢排忙緊幫薛家燕嘅藝術中心教班小朋友，因為佢哋8月要拍微電影，過兩日就拍，同埋家燕姐、胡琳同王梓軒一齊，陣間我就趕返去教班。」