當年今日
關於我們
隔牆有耳:
星光大道遷星光花園 手印豎起晒 - 李八方
蘋果日報 2015/11/13 00:00
尖沙嘴星光大道擴建計劃繼續開展工程,政府同欽點嘅新世界集團懶理爭議,上月初開始封閉星光大道,為期3年。為免遊客摸門釘,新世界喺尖東海濱花園平台設「星光花園」,將李小龍、梅艷芳、麥兜同香港電影金像獎女神嘅銅像、明星手印搬晒過去。
花園喺嚟緊星期日正式開放予公眾,噚日八方有幸參觀,多唔多嘢睇就見仁見智,好似一幅長63米嘅壁畫,將17套經典港產電影場景重現,有《新不了情》、《金枝玉葉》等,大家去到可自拍吓。而明星手印則全部重新倒模兼「豎起」晒,等大家唔使好似以前咁,「辛苦」踎喺地下同手印合照。
不過有遊客話,要問裝修工人先知花園喺邊,有啲就自己盲舂舂先去到。八方試過由文化中心星光大道行去星光花園,雖然沿路有指示牌,但行吓搵吓都用咗15分鐘。
63米長的壁畫上,重現場景包括《金枝玉葉》中哥哥造型。