韓劇《急診男女》男星崔振赫噚晚係九展舉行粉絲見面會,佢即場唱咗四首歌,不過佢就不停強調自己感冒,把聲唔好,但都會盡最大努力去唱歌,希望粉絲明白,粉絲自然大叫「冇問題」啦,當唱到《繼承者們》OST時,崔振赫仲話佢唱得唔好時,大家要理解,當唱《本能》時,佢就大晒rap實力,唱唱吓仲除咗件外套,拋咗落台送畀粉絲,粉絲們即瘋狂搶衫,而崔振赫之後仲指住接到件衫嘅粉絲唱歌,冧爆嗰位粉絲。不過崔振赫唱完之後又講笑叫粉絲還返件衫畀佢,大會司儀就問崔振赫可唔可以除多件衫嚟送畀粉絲時,崔振赫即笑而擰頭同抹汗。
適逢下月9日係崔振赫29歲生日,粉絲們專登準備咗個蛋糕畀佢,台下仲舉起牌:「多謝你成為我的演員」嘅橫額同唱出韓文生日歌,令崔振赫好感動。問到生日願望時,崔振赫話:「我可能今年就會入伍,到時成兩、三年都見唔到大家,希望大家可以等到我退伍,同記得我崔振赫呢個演員。」
崔振赫又話今日好開心見到大家,但要通過翻譯嚟同粉絲交流覺得好鬱悶,所以係佢入伍期間,佢會努力學晒全世界語言,之後再同粉絲溝通。跟住就再提起噚日下午來港時,好似冇乜心情咁,佢就話:「想同今日接機嘅粉絲道歉,因為佢落機時未訓醒,又冇化妝,頭髮又亂,所以一心只想逃跑,冇咩點同大家打招呼。」