「電訊系」馬主張敬石兄弟嘅電訊首科（8145）今日喺創業板上市，咁啱老三張敬川隻「電訊至尊」噚晚出賽，可惜跑包尾，會否預示馬場失意，股壇得意呢？呢隻股集資3,000萬，上市費佔咗1,510萬，確係幾得意。港交所（388）CEO李小加係咪怕年尾交唔到數，唔止大小通吃，係咁小都吃？

電訊首科同電訊盈科（008）差一個字，但經營嘅生意就極之唔同，電首做手機維修，截至今年1月底十個月收入6,354萬，純利得166萬，較截至2012年3月底止全年純利，跌近九成，原因係公司計入部份上市費用。
公司上市費一千幾百萬冇走雞，律師、核數師全部計錢，奇就奇在，電首集資3,000萬，明知使費千幾萬，扣埋公司得1,490萬落袋，咁都上市。為隻殼還是為提高知名度呀？先達班手機大佬會否考慮聯合上市呢？
咁千五萬可以做乜？公司話，有意收購旺角銀城廣場一至兩個單位自用，做客戶服務中心，市價一、二千萬，一年可以慳番約廿萬開支喎。抵唔抵真係見仁見智，電首嘅股份配售咗畀150名投資者，其中一人仲認購超過300萬股，夠晒捧場。

李華華
mailto:[email protected]