大企業越嚟越注重危機管理，不過，即使如數一數二嘅地產大藍籌，當遇到大股東因為家事影響企業名聲，公關大員一樣企喺度唔識反應。講到市場上處理危機經驗最豐富嘅，華華首選新世界發展（017）董事總經理助理關則輝（CF）。數佢當年處理過嘅「危機」，包括國泰空姐工潮、新巴勞資雙方衝突……CF除咗幫企業化危為機，最近華華知道，佢仲將一身公關絕技傳授畀一班中年人，幫佢哋重新建立事業。
得到CF傳授武功嘅係一班四五十歲車衣女工。CF話，班女工喺七八十年代撐起香港工業半邊天，不過，隨着工業北移，呢班女工空有一門手藝，無用武之地，一係迫住轉行、一係屈喺屋企，冇晒自信。於是慈善團體樂群社會服務處出手，社區投資共享基金（CIIF）籌錢，為呢班女工搞社會企業做生意。CF就做軍師，教佢哋建立品牌。