鄭裕玲--鍾意蒲
「聽到個消息好唔開心，從另一個角度睇，對佢係一種解脫，佢就會冇咁辛苦。我以前喺無綫做《BandBand咁嘅聲》時訪問過佢，佢鍾意應酬去蒲。佢嘅離開對我有好大啟發，我覺得以後應更要做多啲鍾意做嘅嘢，要趁重有時間嘅時候做想做嘅嘢。」
譚詠麟--最貪靚
「羅文都好努力搏鬥，呢場仗喺心理上佢係贏咗，我之前都有去探過羅文，但探得多都對佢造成壓力，雖然見唔到佢最後一面，但可能係佢嘅心願呢，大家都知佢最貪靚，總之身後事我哋會全力配合，其實上一次喺瑪麗醫院，羅文已經同屋企人交代晒遺言。」
甄妮--百無禁忌
「籮記係我嘅至愛，我知佢有病時就開始食齋幫佢許願，希望佢身體健康，我會安排時間返香港。佢係不折不扣嘅美食主義者，完全冇戒口，我男友喺大陸帶咗四盒荔枝，佢一個人就食咗兩盒，佢份人好固執，百無禁忌，又獨立又豁達，有自己嘅生活。」
陳百祥--滿足無憾
「我由細識佢識到大，以前同阿倫一齊同籮記夾Band，籮記做主，我哋做副，佢好好人，痛失呢個朋友，我好唔開心，我上個禮拜先去探過佢，佢叫我哋出殯時要着得靚靚哋，開開心心咁去佢喪禮，佢對自己嘅地位同得到嘅嘢都好滿足，冇遺憾。」