【本報訊】聖誕長假期展開，維園工展會更人頭湧湧，大批市民、內地遊客入場掃平貨。有本地家庭視工展會為一年一度節目，即使「每樣只係平幾蚊」也樂意支持；有廣州旅客指場內消費划算，豪花約6,000港元，零食、海味甚至家庭電器都不放過，滿載而歸。

廣州女士買滿兩大篋

昨日午後，許多市民扶老攜幼入場，不少更做足準備帶同行李篋和「買餸車」入貨。雖未見參展商大幅割價傾銷，卻仍然不減遊人消費興致。除了糧油麵食、海味湯包成搶手貨，健康食品、家電產品和衣物乾貨也擠滿人群，即賣熟食更是「冇停手」，蛋撻、牛雜、魚蛋、魷魚任君選擇，特色食品如一呎長熱狗亦受遊人歡迎；而昨日日間天氣和暖，雪糕凍飲也不乏捧場客。
廣州旅客譚小姐與朋友來港兩日一夜，昨日率先到工展會大手購物，餅乾零食幾大袋，還有多件電器產品，她個人已消費五、六千港元，「啱心水就買……淨係榨汁機都3,000幾蚊」。同樣來自廣州的朱女士也大包小包返家。她只花千多元，已買滿了兩大篋，「比起出面平一兩成，都算抵買」。
林先生一家四口入場支持本地貨，主要購買海味、日用品。他笑言，「一年一度工展會，點都嚟支持吓」。