賭王四房孻女何超欣今日正日18歲生日，家姐超盈同阿哥猷君輪流飛左去倫敦同佢預祝生日，超盈今日就post左幾張相喺instagram，見佢哋去ball、shopping同party，切蛋糕等，節目豐富。

《蘋果》打畀超盈，佢噚日返到香港，今日就去南京做嘢，佢話：「去咗倫敦3日，因為有工作安排咗，同妹妹Birthday week，梗係要去。」問到佢倫敦恐襲驚唔驚，原來佢係恐襲第二日出發去倫敦，佢就話：「唔驚得太多，都要move on，倫敦啲人住係當地，唔通每日唔出街咩？況且安排咗工作，同阿妹生日，佢18歲，點會唔陪佢。」

見IG相，超盈帶超欣去威，其中一個係參加大英博物館(British Museum)嘅藝術贊助人周年晚宴，同場仲有怡和主席Henry Keswick太太Lady Tessa，超盈就話：「因為第一年入咗大英博物館嘅Patron，所以帶埋佢去director annual dinner，另外有一日時間就同佢去shopping買禮物，同埋余晚晚有個party叫我去，咪帶埋佢去。」

睇返余晚晚個ig，原來超盈去嘅party，係佢同Rothschild家族搞，由於余晚晚入股咗時裝設計師Mary Katrantzou嘅品牌，所以齊齊現身做host。