有「電訊魔童」之稱嘅王維基轉型「賣肉」？雖然香港電視（1137）啲網絡劇最終唔係好收得，不過網購生意就越做越大。新嘅一年，港視斥資設立凍倉，更加一口氣買入30架裝有雪櫃嘅客貨車（俗稱「雪車」），大搞冰鮮食品運送服務，似乎亦想同超級市場甚至街市較勁，鬥搶師奶客。
最近搭港鐵（066），又見到港視大賣車站廣告，條廣告橋非常過癮，應該係想師奶們諗起有乜特別日子，就「劏雞還神」，以優惠價買唔同冰鮮肉類賀一賀。

客戶未天光就網購

港視就話，今次冰鮮食品搶購優惠只係去到下周四，原本組合價格超過300元嘅法國春雞、美國肥牛片、梅肉片、帆立貝、北寄貝同越南虎蝦，𠵱家99元就可以買到，每日限量500份。
有着數當然受歡迎，之前港視每次開賣時間係凌晨4點，每日推出一陣就賣晒，港視人都好驚訝咁話：「點解啲人天都未光就網購？」於是𠵱家改為每日朝早6點同下畫1點分兩次開售，不過總數照舊，所以要搶優惠就要較啱時間。
至於用戶若購買冰鮮貨品後，同時想買乾貨會點？港視人話，公司會安排分開包裝，盡量一次過送貨。
不過，講來講去，大家最關心王維基呢盤網購生意成績如何？見佢keep住揼本大搞，似乎前景唔太差。港視舊年2月正式推出網購服務，根據公司截至6月底中期業績，直接商品銷售嘅營業額有570萬元，想知成年生意如何，就要等佢公佈全年業績喇。

李華華
mailto:[email protected]