當年今日

唔怕食蛋黃 - 左丁山

蘋果日報 2015/09/30 00:00


老友飯局在灣仔Novotel酒店地庫嘅老上海開飯,第一道小吃就係熏蛋,金黃色蛋黃特別吸引眼球,平時非常講究飲食健康嘅地產F第一個舉筷,老友特登問佢:「唔怕膽固醇咩?」地產F笑言:「最新哈佛陳曾熙公共衛生學院嘅網頁有一篇講及蛋黃唔怕食,最怕食得太多,一日一隻蛋可保健康,唔會對血管病、心臟病構成威脅!」咁update?幾位仁兄立即拿出手機上網核證一下,果然是真的,網上有唔少新資訊講到蛋黃有益,一個人除非已經長時間患上超標高膽固醇,或心臟病,每日吃一個全蛋(蛋白加蛋黃)無妨,最好方法係用平底鐵鍋加入少許橄欖油慢火煎。
既然如此,人人吃番半隻熏蛋,食完飯就係假期啦,欣逢中秋佳節,家中月餅滿堆,多到眼花撩亂。去年俾老婆窒住窒住,不敢多吃,無復三十年前每天早上吃一個雙黃蓮蓉當早餐之勇,今年得知吃蛋黃無妨,又吃之哉,但胃納已冇咁好,食半個奇華雙黃蓮蓉算嘞,中午就吃蔡瀾老兄監製之名產抱抱月餅(五仁金華月),勝在好𡁻,懷舊之人最啱食,家中新派年輕人就鍾意奇華15年陳皮貢餅(陳皮紅豆沙月),切開貢餅陳皮香撲鼻而來,咬兩啖就可以食完一個。
咁多月餅,食唔晒點好?咪送出去囉,菲傭原來亦鍾意食月餅,願意接受一啲,寄回鄉下,就似幾十年前左丁山阿媽帶月餅回鄉咁嘅情景,今時今日。中國強大起來了,自然唔需要香港同胞接濟月餅,但凡係Made in Hong Kong嘅月餅,在內地大受歡迎,令本地月餅製造商每年笑到四萬咁口。
某大機構每年皆有大量月餅送禮,今年由某著名酒店集團包辦,月餅設人事部擺放近二十盒在lobby,叫員工任食,但未開之前,不少員工先睇吓月餅盒底部,知道係「東莞製造」,即刻彈開。既然無人要,人事部想話送晒俾一啲志願機構(安老院),點知人地亦小心問清楚是否內地製造,知道係東莞貨之後,個個話唔要。堂堂大國富裕城市製造之月餅,落得堆填區下場,真係該煨,陳佐洱罵香港人搞去中化,不去殖化,此事可作旁證,不過陳佐洱之流亦應該自責自問為何國產食品竟然變成人見人怕,Made in China變成趕客標籤!