新一季中超今日正式開鑼，上季冠軍廣州恒大同廣州富力上演廣州打吡。而你無睇錯，最終富力憑前鋒薩哈維連中三元，以5:4險勝有阿倫連中三元嘅恒大，喺天河體育場撃敗同市宿敵。

廣州恆大各項戰線近5次主場面對廣州富力，2勝3和保持不敗，上季恆大主場同富力兩度交鋒，分別係贏7:2同埋打2:2和。呢場比賽富力先拎到入球，薩哈維開波61秒就以一記靚波為客隊領先。未夠10分鐘，薩哈維再憑反擊得手，領先兩球。此時，主隊恒大由前鋒阿倫吹起反擊號角，只係用左32分鐘就連中三元，帶領恒大反先。

下半場繼續入球停不了，薩哈維不讓阿倫專美，禁區外起腳抽射得手，成為今場第二位連中三元球員。65分鐘，富力嘅烏素射門，恒大門將劉殿座「屙蛋」，富力反先4:3。但3分鐘後，高拉特操刀12碼，再次為恒大追成平手。可惜，最後畀富力嘅國腳前鋒肖智75分鐘巧妙頂入，最終輸4:5。

今季由簡拿華路帶領嘅恒大一直未能發揮應有水平，亞冠盃兩連和之外，名牌外援亦未見，加上開鑼戰慘敗，防守漏洞百出，睇嚟今季大簡都好頭痕。

--------------------
踢出我天地！【HUNGRY HEART X BFB CHAMPIONS 2.0】合作活動登場！登入即得主角★7葉恭介！ http://bit.ly/2xrTKGM