顏卓靈、倪晨曦（Elva）同蘇皓兒今日喺銅鑼灣出席護膚品牌活動，其中Elva罕有咁以開胸長裙示人，佢直言驚走光，所以做足打底措施。講到護膚，顏卓靈話：「我會注重清潔同保濕，平時有好似Elva咁做瑜珈排汗。」至於Elva就話心情好皮膚自然靚。

唔知佢哋又有冇試過幫男友護膚？Elva話：「有幫佢敷面膜，雖然佢起初有啲抗拒，但後來見到皮膚有改善，o依家會自動自覺做。」顏卓靈又有冇幫男友白只敷過面膜？佢即刻笑住講：「有敷過一次，但佢塊面同張面膜有啲距離，所以有啲位敷唔到。嗰次之後，大家都冇再提呢件事啦。」

此外，顏卓靈透露平日跟白只打扮都係好隨意：「我哋係鬥貼地，着到大地係我家咁，長期好似住喺樓上就落街啲街坊裝，我仲試過着睡衣去上戲劇堂。」旁邊嘅Elva就話好佩服，因為自己一定會作多少打扮先出街，亦唔會同男友着街坊情侶裝。

精選娛聞，喺晒《娛果》
http://fb.com/appledailyent