明年3月11日立法會補選大日子固然重要，但查實中西區區議會年底嘅兩席補選亦不可忽視，尤其東華選區，原屬民建聯當區區議員蕭嘉怡因為做官半途捨選民而去，令民記支持或因而流失，民主派磨拳擦掌想攞番舊地盤，民主黨小花伍凱欣同前建測界議員姚松炎據知都想披甲。

主持港台節目有口才

民記點樣迎戰？據聞或者會搵「同心網絡」秘書長、民記中西區支部委員劉天正（Timothy）出戰，佢近日正式「出櫃」，着住黨衫喺東華選區擺街站宣傳，與此同時民記港島區立法會議員張國鈞亦喺facebook貼出同對方合照，形容Timothy係「中西區的新星」 ，仲指對方「盡得嘉怡的真傳」，似乎刻意力谷噃！
據聞Timothy口才不俗，係港台節目「好孩子星期天」主持之一。今年7.1，佢仲po咗張那些年做大戲時獲林鄭頒獎嘅相，hashtag「我真係識唱粵曲」。不過有區內人士仍然質疑，Timothy到底係咪民記真命天子？皆因盛傳民記想搵地區友好而非黨友出戰，莫非Timothy只係搞掩護戰？