現年52歲人稱「豆導」嘅台灣導演鈕承澤被指控性侵新片《跑馬》嘅女工作人員，喺台灣引起軒然大波。案件仍然喺台北地檢處聆訊，但據台灣《壹週刊》報道，原來鈕承澤早於九年前已經因為性侵惹禍要擺「和頭酒」道歉。

據報道，鈕承澤喺九年前電影《艋舺》煞科後，經一知名歌手介紹下認識由美國返台灣玩樂嘅A小姐，當晚一行人玩樂至清晨，鈕承澤相約A小姐食早餐，實際就帶咗A小姐返屋企意圖性侵。

據知，A小姐奮力逃出後打電話搵知名歌手求救，於是當晚鈕承澤喺台灣藝人黃立成開設嘅酒吧擺「和頭酒」道歉，稱「不好意思，我喝多了，不記得」。

呢場「和頭酒」有唔少藝人見證，因落藥迷姦及偷拍多達60名女星、女模而被判入獄30年嘅台灣富二代李宗瑞亦為座上客。

事隔多年，A小姐最近回應傳媒指因為涉及太多人，所以希望事件平息，不過佢話：「當時不敢鬧大，但終於等到這一天。」至於事件中嘅其他藝人，均稱不知情或不獲回應。

精選娛聞，喺晒《娛果》
http://fb.com/appledailyent