日本男星堺雅人因為《半澤直樹》爆紅，套劇早前已大結局，佢就翻去做《律政狂人2》，《半澤》熱潮亦間接帶挈咗《律政2》收視高。喺《律政2》入面，佢演一個講嘢毒辣嘅超強律師，鬧人好似機關槍一樣，係咁掃，毫不留情，毒舌台詞多到爆。據日本媒體報道，雖然今次拍續集，不過咪以為佢做慣做熟好易演呀！新劇入面佢講嘢要連珠爆發，毒舌鬧人唔換氣，加上法律專有名詞比其他演員多好幾倍，令佢鬼咁頭痛，做到嘔咁滯，身經百戰都無奈咁話：「呢部戲可唔可以早啲煞科呀？」