近期本港熱門話題「八十後」，被人叫「上海姑爺」嘅瑞安集團主席羅康瑞亦趁熱鬧，對「八十後」發表一番見解。佢鼓勵呢班後生仔要北望神州，因為香港實在只係「豆膶」咁細嘅地方，毫無發揮可言，仲話後生仔應該大膽創業。
羅康瑞噚日出席浸會大學僱主午餐會，向在場學生分享經驗。佢話即使創業失敗，亦可以學到寶貴嘅經驗，明白做僱主嘅苦處，將來就會成為一個好僱員。佢又提醒「八十後」應該學識了解自己，做事要親力親為，工作初期唔好講咁多興趣，最緊要將上司交託畀你嘅事做好。

嘆八十後捱唔到苦

對於早前一班「八十後」表現激進，佢覺得「八十後」較個人化同自我，唔接受妥協，有勇氣熱情但冇策略。佢好為呢班「八十後」擔心，以佢公司瑞安推出嘅優才計劃為例，同時有香港學生同內地學生應徵，最後冇一個香港學生捱得住，佢話：「香港學生淨係掛住今晚去邊度wet，內地生就抓緊機會學英文。」
其實唔單止八十後，佢對香港經濟政治前景都好擔心，佢覺得「家芝麻綠豆事都內耗」，廿幾年前就話超前內地好多啫，家兩地已經越嚟越貼近，好易被內地爬頭；佢就鍾意住上海多過香港，起碼冇狗仔隊。
李華華
mailto:[email protected]