今年11月就係區議會選舉嘞，如果有意參選嘅人𠵱家仲未落區做嘢，想贏都真係幾難。上年喺區議會海怡西補選中，撼低前港姐、人民力量主席袁彌明嘅新民黨小花陳家佩（Judy），就喺呢個中產區搵到個地區問題加以發揮。

發掘走光黑點

到底係乜東東？原來發掘到該區嘅海怡西商場新地磚太過反光，隨時成為女士嘅走光黑點。
八方問過Judy，佢話呢排海怡西商場翻新地磚，但呢批新地磚太光、太滑，搞到唔少師奶去佢辦事處投訴，擔心走光同跣親，所以佢將會向商場嘅管理公司反映，前幾日仲拍埋片，公告天下。
八方唔知咁樣係咪為咗他日「成功爭取」，但好明顯，佢搶緊民建聯葛珮帆（EQ）飯碗，事關「女士走光黑點」可謂EQ嘅專題研習項目，自2009年起佢每年都會公佈「全港走光黑點」，攞到唔少曝光機會，𠵱家有人加入搵走光黑點嘅行列，唔知EQ面對小花，又會點樣迎戰？