唔少人分手後，都唔知點處理前度個FB。意思係以目前FB嘅功能，如果你唔太想見到前度嘅Post，你一係「隱藏」（Hide）佢嘅Post，再唔係就Unfriend佢，甚至Block鬼咗佢。不過有時感情嘅嘢，係好複雜嘅，你係就係唔想知咁多佢冇咗自己之後嘅近況，但又唔想完全斷Contact。

咁FB最新就公佈，推出新工具去幫幫你處理呢個問題。當你去轉你FB嘅RelationshipStatus時，FB就會俾你揀，Newsfeed出現少啲前度嘅Post，即係除非你主動開佢個FB去睇，否則你不會再喺Newsfeed見到佢個名出現。最重要係，前度係會唔知你用咗呢個功能。

仲有，你亦可以多一個選擇，就係令前度睇唔到你嘅Post，亦可限制邊個可以睇到，你過去同前度一齊出現或「放閃」Post。FB表示，當然，以上功能，用戶可以隨時轉返原本設定，所以就算復合後，都唔怕以後睇唔到對方個FB。

新功能今日最先喺美國推出，未來將會根據反應，向其他地區推出。FB就話，希望呢類工具，令用戶分手後，用FB都可以感覺良好。

掌握財經生活資訊，即Like「蘋果ATM」fb專頁啦！
http://fb.com/appledailyatm