當年今日

新登場:
$88品嘗五星級酒店大廚自助餐

蘋果日報 2002/04/05 00:00


受過星級酒店嚴格訓練約十年的廚師,如今落入坊間的西餐廳,並把過去所學所知用諸Cafe的菜式當中。那套酒店式的作風:用料新鮮、醬汁自製、款式多變、質素穩定、賣相精緻及以客為先等,堅持不變,但價錢卻作出大讓步,以酒店的五折價──$88,供應酒店水準的自助晚餐,咁抵食?當真!條件係預早訂位吖。

記者:楊一凡攝影:陳智良
海鮮小炒
拍攝當日的海鮮美食當中,至惹味的是泰式燒魚及薑葱炒花蟹,原條皮光肉滑的比目魚,先加香茅、南薑、紅椒絲、檸檬、檸檬葉、唐芹及魚露,然後用香蕉葉捲着烤熟,確保肉汁不會流失。炒花蟹至緊要好鍋氣,爆香薑和葱後,加切件花蟹,灒酒,兜兩兜,香氣四溢。
Raymond試味:
初頭以為條比目魚咁大條,肉質會嚡口,誰知剛好相反,肉好嫩,魚皮油潤。
清淡之選
追求高纖清淡的你也同樣咁有口福,蟹子蛋白津菜是用上湯烚熟津白,芡汁是用上湯加蛋白炒勻,淋上面後綴以搶眼的蟹子;南乳炒羅漢齋,配料如木耳、雲耳、甘笋、蓮藕、冬菇、枝竹和雜菜等,都索了濃濃的南乳香味。

試味報告:
鮮味的上湯把津白與生俱來的鮮甜推至高峯,上湯蛋白芡像被窩一樣,溫暖着津白,幾時都溫柔可口;齋菜味濃,配料豐富,集爽、滑、軟和煙韌於一身。
烤羊腿
新西蘭羊肉質地至嫩滑,肉味香濃,肉汁最豐富。原隻肥髀,先𠝹肉縫楔入原粒蒜頭,後加迷迭香、芥末醬、香草、紅酒及調味,醃過夜,烤至半熟,便可切片給客人享用;羊腿的燒汁用牛骨、西冷、雞骨、雜菜、香草及紅酒熬兩日,讓肉汁濃縮,出場前再加紅酒及迷迭香滾一滾,提升香味。
鄭小姐試味:
羊肉好多汁,好軟熟,個燒汁味道好濃烈,能帶出羊肉香,薄切實唔夠喉,切厚身些少伴芥末醬,慢慢歎最正。
下火湯水
有鑑於自助餐常以西湯為主,店方一於在西湯之外加個老火湯及清補涼糖水,熬足四粒鐘的老火湯口味日日不同,鱆魚蓮藕湯、八寶冬瓜粒和節瓜煲蓮子豬肉均有機會跟大家見面;西湯有甘笋茸湯、南瓜薯仔、雜菜湯及忌廉蘑菇;中式糖水如清補涼、紅豆沙及香草綠豆糖水等。
Ken試味:
今日個老火湯係鱆魚蓮藕,味道幾濃,連啲排骨湯渣都煲到腍晒,真係好似亞媽煲嗰啲。清補涼煲到起晒沙咁,好清甜滋潤。
鮮味頭盤
頭盤陣容都幾強勁㗎,燒牛肉、煙鮫肉、白菌腸、辣椒腸、芝麻八爪魚、煙三文魚、各式沙律、鮮果和雜菜等,食客們的心水當然是肥大的美國生蠔及鮮三文魚啦,兩者都鮮美豐腴,而且長食長有,新鮮供應。
Ann試味:
最抵食當然係生蠔啦,好鮮甜,又不斷供應;自助沙律吧都好正,醬汁自己加,配料新鮮。
滋味甜品
頭盤主菜後,十款中西甜品輪流服侍你,法式燉蛋、人氣Puff、白朱古力慕絲、芝士蛋糕、白酒雜果啫喱、烚蛋白波波、黑森林及鮮果等,五光十色鋪滿Buffet枱。西餐廳讓廚師們有足夠的空間,發揮自己的甜品小宇宙,做到天天新款。

試味報告:
芝士蛋糕好香濃,法式燉蛋滑嘟嘟,白朱古力慕絲甜入心,貌似棉花糖的烚蛋白波波,輕飄飄。
店名:滙星西餐
電話:27549222
地址:九龍灣常悅道9號企業廣場一期一樓B舖(地鐵站A出口)
座位:155個
營業時間:上午11時半至晚上9時半。
自助餐資料:周末自助午餐只於星期六、日及公眾假期供應,時間由中午12時正至下午3時,成人$68,小童$58;自助晚餐由每晚6時至9時半,成人$88,小童$68。自助餐以外的時間會供應西菜、午巿套餐及下午茶餐等。
付款方法:現金及信用卡(Master,Visa)