現年66歲的城中富豪劉鑾雄去年因患腎衰竭要換腎，一場大病更令他體會甘比才是最重要的女人，二人拍拖十四年，並於同年12月註冊，甘比正式成為劉太。今年初大劉以「健康極之不穩」為由分身家，將華置50.02%股份分給甘比一對仔女，令甘比身家暴漲至逾547億，一躍成為香港女首富。

大劉大病初癒，近月身形及狀態逐漸回復，原來他有心有力，再度榮升做爸爸。本報收到消息指甘比已陀B近四個月，二人之前育有8歲大女秀樺及4歲細仔仲學，湊夠一個「好」字，今次再度有喜別具意義，皆因是二人婚後不久即造人成功，再有愛情結晶品，更證明大劉身體已沒大礙，清除外界對大劉健康情況的疑慮。

準媽媽甘比近日如常外出湊子女返學及外出shopping，日前約下午5時許，她由保鑣護送下在銅鑼灣利園shopping，到劉家上下的愛牌Hermès店掃貨。甘比出巡打扮已見孕味，她身穿一條牛仔鬆身裙及平底鞋及戴上白色帽，她入到店後，其間不經意雙手插裙袋護肚。作為此品牌超級VIP，店員見到甘比相當殷勤，甘比在店內主力睇手袋，她更做了功課，將手機裏的相片給店員看，不過似乎未有她心水款式，後來更有疑似店舖經理前來招呼她，二人相當熟落，有講有笑。

最後，甘比逗留半小時便離開，身邊的保鑣見有記者採訪十分緊張，即以身體及開傘遮擋兼開路，甘比步出店時，更顯肚凸凸，身形發福了不少。本報記者致電甘比，問到她有喜一事，她表示：「多謝晒！」再追問有多少月身孕，她表示：「其他嘢唔回應啦！多謝關心！」

甘比雖為大劉再陀金叵蘿，但她如常湊一對子女返學、放學，她於上周四約下午4時許，與母親湊一對子女放學後，便到銅鑼灣皇室堡的冒險樂園玩，當時她以白色連身裙及涼鞋的孕婦look現身，更陪細仔仲學玩氣墊球遊戲，又會合大女囡秀樺與婆婆玩拋籃球，絕不錫身。之後，甘比又陪仲學去玩推水晶機，見到仲學相當精靈，玩了幾次即上手，收獲豐富令他相當興奮跳起，身邊的保鑣就負責袋戰利品入環保袋，之後秀樺及婆婆亦加入一齊推，眾人玩足一個多小時才離開。