叫雲格下台已經唔單止係英國阿仙奴球迷嘅事，全世界嘅「反雲黨」都用佢哋嘅方法，喺唔同嘅場合高舉寫住「Wenger Out」嘅標語。有英國傳媒統計最近出現過「Wenger Out」標語嘅地方，遍佈四大洲，由演唱會到WWE比賽都見到人叫雲格下台。

最新一單喺禮拜日晚，喺美國舉行嘅WWE WrestleMania 33賽事，喺呢個同足球點都拉唔上關係嘅場合，有槍迷趁電視台記者做緊直播嗰陣，喺後面高舉「Wenger Out」標語。真係估唔到美國「反雲」風氣咁盛，除咗今個月嘅WWE比賽，喺上個月喺洛杉磯舉行嘅世界棒球經典賽、喺邁阿密舉行嘅音樂節都有人「反雲」，而喺加拿大溫哥華舉行嘅七人欖球賽，都有人舉起「Wenger Out」標語。唔知嚟緊嘅香港七人欖球賽，又有冇槍迷去抗議呢？

除咗北美區，大洋洲同亞洲都有「反雲黨」出沒。喺三月底新西蘭嘅世盃外同埋喺澳洲舉行嘅板球比賽，都有球迷叫雲格下台。亞洲方面，英國樂隊Coldplay過去周末咗新加坡搞演唱會，有人拎咗「Wenger Out」去睇。作為「反雲」基地嘅英國，係最先見到有「Wenger Out」亂入嘅地方，喺二月嘅反特朗普遊行入面，竟然有人舉牌叫雲格走。另外，喺瑞士嘅國際足協總部門口，竟然有人貼咗張「反雲」標語喺FIFA嗰名度。唔知嚟緊港超聯，會唔會又有球迷入場「反雲」呢？