恭喜、恭喜！恭喜「大學師生監察無良企業行動」成功令800名民工下崗（失業）！「大學師生監察無良企業行動」（下稱為：無良師生SACOM）係一個「好心」組織，喺2005年開始「監察」喺祖國生產Disney產品嘅工廠。大家都記得，我哋特區嘅廸士尼公園喺05年開幕，當時引來一大批反對民工有就業機會嘅「好心」人大唱「老鼠愛大米」示威。當時，孫柏文都冇覺得點，覺得佢哋只要淨係「好心」而做唔到壞事，就當班學生被誤導參加咗啲硬膠組織。
點知，上個禮拜深圳市出現罕有嘅示威集會，因為呢班「無良師生SACOM」成功令Disney威迫租用Disney品牌嘅公司從一間叫做「煌星輕工製造廠」嘅代工廠抽起定單。呢間廠一冇定單，就執笠。呢間廠執笠，就令工廠嘅民工即刻失業。呢班民工被「無良師生SACOM」奪去就業機會之後，即時上街示威，抗議一班豐衣足食嘅大學師生剝削佢哋生存同工作權。
孫柏文仲要收到匿名信，內容訴說︰「點解呢班無良師生，唔肯接受我哋要求有特長工作嘅時間？我哋係以計件的方式計算工資，多勞多得。我原本係工廠裏面最勤力嘅民工，差點兒就可以儲夠錢，新年之後無需要再南下搵工，點知，老闆話有壓力唔可以喺周末開工，所以新年之後又要再次南下。現在，就連份工都冇埋，孫柏文先生，你可否幫幫我哋用隻金手指去篤醒佢哋，佢哋為咗安撫自己係中產嘅罪咎感而引發嘅行動，係會害死人！」