【師兄你點睇】關於莫雷拉利敬國 我各有一駒推介！（賴維銘）
蘋果日報 2019/11/09 06:00
莫雷拉賴維銘為善聚樂利敬國電訊火箭師兄你點睇
電訊火箭強配莫雷拉爭首捷- 為善聚樂轉由利敬國策騎出賽
賴：前騎師賴維銘
記：記者吳文輝
記：記者吳文輝
記：睇番騎師榜，莫雷拉同潘頓今季夾埋已勝出58Win，超過頭馬總數嘅三分之一，唔買佢哋啲馬真係好難贏錢。
賴：咁兩位騎師近季表現都有目共睹，多好馬畀佢哋揀亦係理所當然。比較之下，我更睇好莫雷拉，因為佢騎到輕磅馬選擇更多，好似今日（9日）第三場四班1400米嘅「電訊火箭」，就有好大餐士勝出。
「電訊火箭」至今未勝，不過今季表現出良好實力，前仗跑1400排大外檔，該役步速好快。
「電訊火箭」沿途被頂出三叠望空，極為吃力，正常情況入直路好快收工，但此駒竟然可以保持走勢，末段更有一點追勁，就算落敗都好值得讚賞。
上場「電訊火箭」守靚位理應好跑，但本身偏向均速，唔夠兩匹今季贏過之馬「綠尚飛馳」和「熱血鬥士」衝，演出仍算唔曳。
「電訊火箭」出閘反應快，以莫雷拉騎法應會跟前，憑輕磅直路走甩，形勢樂觀，相信可順利開齋。
記：除咗兩大高手外，利敬國都算係今季嘅驚喜。
賴：其實睇番此子一直表現，騎半冷馬經常有神來之筆，我今次就鍾意佢第二場五班1800米座騎「為善聚樂」。
呢匹五歲馬我以往在牠高分時騎過，結果減到廿幾分才連勝兩場，實力非強，勝在成熟後時有好走勢，係一匹低班有用之馬。
上仗谷中一哩排12檔，一早縮喺後面，未受太大考驗，熱身一場後上力更足，體重接近贏馬時水平，騎者手風順不妨留意。