韓國人氣綜藝節目《Running Man》2010年首播以來，一直由7位成員劉在錫、宋智孝、Gary、李光洙、金鐘國、HaHa及池錫辰主持節目，佢哋6年來合作無間，亦有錢齊齊搵，拍住到亞洲各地搞巡迴見面會。

不過今日韓國方面就傳嚟壞消息，同智孝喺節目中配成「周一情侶」嘅Gary為咗專注音樂事業，宣佈退出節目，令唔少粉絲晴天霹靂。而Gary方面早於2012年已有喺網上透露想退出所有綜藝節目嘅念頭，據知當時Gary因為組合Leessang嘅事宜而有感而發，但當時《RM》方面就話冇聽聞，粉絲亦喺網上留言勸Gary要留低，最終Gary就未有退出繼續節目。

而今次Gary似乎去意而決，加上佢不時喺節目上都會話唔想受懲罰，因為一陣要錄音之餘嘅說話，估計佢要兼顧音樂同《RM》都幾吃力，所以最終決定退出，《RM》劇組今日亦確認呢個消息，Gary鐵定離開節目，而Gary亦會於下周六來港喺銅鑼灣皇室堡見粉絲，唔知到時佢會唔會講吓退出《RM》嘅感受呢？

不過今日消息傳開後，各地粉絲都好激動同唔捨得，唔少本港《RM》粉絲都留言高呼《RM》成員係7個，接受唔到六缺一，高呼「一個不能少」，有粉絲就話完全接受唔到Gary退出節目，亦有粉絲覺得可能Gary同智孝真係變成拖友關係，為免尷尬，所以Gary就犧牲自己離開節目。而唔少粉絲都覺得節目已經做足6年，雖然更換過PD，但節目收視都毫無起色，亦因為冇晒新鮮感，所以節目比以前失色不少。更有網民直提議可以再搵宋仲基Oppa回歸節目，事關宋仲基都係由節目開播就出演，不過最終宋仲基只出演1年到就離開節目。