早前雷雨交加之夜，有人聲言目擊UFO在香港上空掠過，噚日喺中環亦出現疑似不明飛行物體，引起一陣驚慌。特首煲呔噚日去立法會，喺停車場落車後，好親民咁接近示威市民，接收抗議物品，就喺呢個時候，喺煲呔頭頂不遠處上空，忽然出現兩架飛行物體，在場人士紛紛岳高頭，睇吓發生乜事。

現場目擊者稱，其中一件飛行物體，起飛冇耐已經被保安人員「擊落」，另一件成功突圍，飛到煲呔附近盤旋，由於飛行物體來歷不明，在場保安員同G4大為緊張，即時開遮為煲呔護駕，恐防飛行物體突襲。幸好飛行物體冇進一步行動，煲呔安全進入立法會，虛驚一場。
噚日天朗氣清，保安員人手一遮傍身，係因為之前曾發生示威者潑水、掟豆腐事件，因此立法會保安員家要隨時開遮擋雜物。煲呔入場後，件不明飛行物體繼續盤旋咗近三分鐘後，先至慢慢降落，有警員即時上前沒收，帶入立法會。
其實呢件飛行物體係透過iPhone遙控嘅飛行器，乃係潮人玩意，賣成2,000幾蚊，唔少人買嚟喺屋企玩，拎返office同女同事一齊玩更多，至於噚日兩隻飛行器物主是誰，暫時無人認頭，有人話見到喺社民連示威者附近起飛，估計係佢哋所為。

場外虛驚一場，煲呔噚日一抵達立法會議事廳再受一驚，長毛未等煲呔企定，急不及待衝前兜頭掟出一件示威道具，煲呔強作鎮定，仲自己執番起件道具，個樣好輕鬆，梗係啦，長毛率先自行離席，即係唔會喺宣讀施政報告時玩嘢啦。
可惜煲呔開心得太早，社民連噚日唔覺有出招，但係職工盟李卓人卻手痕，在煲呔讀施政報告期間，忽然拮爆個氣球，爆波聲浪顯然嚇親煲呔，只見煲呔即時黑面，主席曾鈺成勒令阿人要管理好自己物品，唔好再玩嘢。
事後阿人話爆波唔係示威或有不滿，而係對煲呔全港推行跨區交通津貼，同研究標準工時表示讚賞，爆波係讚佢做番件好事，煲呔唔好怪錯好人。

mailto:[email protected]