東京股市臨尾香，唔見176點。港股託賴，有兩大重磅股滙控（005）同中移動（941）撐住，總算捱到收市，只跌33點。如果長和爭氣少少，有機會唔跌，今日做「賊」制唔過，客串做番「兵」，唔好咁勇，博反彈希望博餐晏仔。
恒指C輪2438：今次唔揀牛證，博番隻中期恒指C輪2438。隻輪輪價17.1仙，明年2月底才夠鐘，溢價6.3%，槓桿率17.1倍（有效9.2倍），引伸波幅20.2%。揀呢隻輪係貪佢嘅溢價低過同一日到期嘅3443（溢價7.8%），即使俾淡友踩多幾腳，都未致渣都冇。假如李超人上演一幕《超人強戰回歸》，長和齊齊勁彈，恒指隨時彈高200點，上番17120，計一計，隻輪理論價去到0.232元，有11%升幅，唔只食個麥記咁簡單。

補充一點，若嫌恒指C輪彈幅唔夠吸引，可睇番長和C輪，白骨纍纍過後，通常彈得更輕身。
日經C輪2125：2125跌過龍，收0.14元，唔見14%。既然睇好恒指有機會彈番轉頭，預期日股好快上番16000關，咁啱就係隻輪行使價。現水平雖係價外，隨時轉番價內，溢價4.8%，槓桿率30.4倍（有效14倍），引伸波幅18.9%，以15900點止賺，隻輪可見0.297元，升足1倍。
章盛