當年今日
關於我們

【李華華搶先睇】股壇大隻佬郭sir澄清冇「分手」

蘋果日報 2016/11/29 21:11

耀才證券郭思治

早前有傳「股壇大隻佬」、耀才證券(1428)市務總監郭思治(郭sir)要與耀才「分手」,華華噚日就親自當面問過郭sir,佢就話絕對唔係報道所講「分手」咁嚴重,只係長時間工作令家人有所微言,要求佢做少啲。年過花甲的郭sir自己就話,入左耀才8年都冇放過大假,一條橡根始終唔可以拉得太緊。
不過佢就叫一眾fans放心,話之後會繼續係耀才分享股票同埋健身心得,肯定唔會「分手」走咗去咁話。咁自加洲執左後,去邊到做gym呢?當時郭sir講過最好有gym搵佢做代言人,但似乎依架都未有人搵上門,所以都係留返係屋企同公司做。
郭sir噚日就以獨立分析師協會副會長身份出席協會周年誌慶,問到會唔會上台露兩手,佢就話為慈善乜都得。華華第一時間提議大隻佬「心口碎大石」,郭sir竟然話「唔好啦」,反提議話想等到學有所成,拎個木人樁上台表演下新學嘅詠春。
計華華話,唔使等啦,郭sir你半年前試過練到忘晒形,打到兩隻手都「爆晒缸」,重要沖涼嗰陣見到浴缸有血先知。謙虛嘅郭Sir話,如果同金融界另一詠春高手、國藝娛樂(8228)主席冼國林比較,佢只係小學級數,冼師傅就係教授級咁話。