呢篇文出街嘅時候，同學們應該都開晒學。我希望大家可以趁考試測驗課外活動未殺到埋身之前，用呢段時間幫自己今個學年定一啲目標，非成績上嘅目標。學業上嘅，就算你唔定，學校都會set畀你。但係個人成長上面，特別係喺呢個冇得咁容易同其他人面對面交流嘅情況下，更加要好清晰咁定立落嚟。

八月中大家見到關於中學教科書嘅新聞就已經係一個好大嘅警號。作為一個90後，常識科由細學到大嘅「三權分立」，而家竟然由教育局開始出手消滅。「六四」嘅前因後果愈嚟愈少，台灣可能變埋做省，慢慢一步一步去改變你對世界嘅認知。

學生而家身處於文革般嘅時代，學校嘅教科書由真理部審核，慢慢地你接受緊嘅就唔再係全面嘅知識，而係方便當權者控制過去未來嘅訊息，所以學生自主求知慾嘅重要性係前所未有咁重要。係過去咁多年，成日都話要培養學生嘅批判性思考 (Critical Thinking)，但係學習嘅氣氛仲係維持緊喺唔問唔錯就唔會樣衰嘅位置。同學就算係好casual嘅工作坊入面，都唔係特別太敢表達自己嘅諗法，自然就會少左練習問問題嘅機會。當唔識問問題，所有嘢就好容易變到餵到埋口就食，因為個人好快就唔會再有自己嘅思考能力。

基本上，知識可以分成三大類：

頭兩個應該都好易理解，我哋日常生活入面最經常接觸嘅就係呢類型。而第三類就係你學一啲完全新嘅野果陣嘅新發現。點樣去發掘呢啲知識其實好簡單，佢最大嘅表徵就係你連要問咩問題都唔知從何入手。

大家試下回想起你對上一次接收一啲完全新嘅知識嗰陣係咩感覺，用力去記住呢種感覺然後用力去追求佢，令自己對吸收新知識呢個行為上癮，盡量享受吸收新知識嘅過程，就係喺呢個時代裝備自己嘅最好方法。因為當而家嘅教育將愈黎愈多你應該要知嘅野隱藏喺第三類入面嘅時候，你只要一懶落嚟，就唔會再有機會搵出答案。

好多時我哋都係想用最少時間幫學生學最多嘅嘢，其中最大原因係因為教學制度逼老師學生趕進度幫準備考試，變相就少左好多機會同時間畀學生去問。但係個底打唔好嘅話，學習能力好快就會到頂，之後愈上就只會愈辛苦。

如果有家長睇到呢篇文嘅話，不妨試下畀少啲壓力自己小朋友，多啲去鼓勵佢地去explore唔同領域。當佢哋重新對新知識上癮之後，佢嘅求知慾就自然會帶佢去新嘅地方。但係如果冇左呢股慾望，就會等於失去自我進步嘅能力，只會成為一個跟從者。只有盡快戒咗對權威盲目服從呢種心態，先有機會幫自己跳出框框，搵到唔同嘅新事物畀自己試。

--

矽日生

一個由細到大都讀書唔叻嘅教育人。廿零歲出嚟創業，跌跌碰碰入咗NGO教學生做創業家唔一定要做老闆。屋企無貓嘅貓奴，打機好廢嘅90後 。

歡迎留言向筆者發問及交流：按此留言

-----------------------------

《本土情味》結集《飲食男女》雜誌經典欄目「老字號」文章，記錄香港40家飲食老店的動人故事，見證香港飲食史的甜酸苦辣。即日起，於各大便利店及書報攤有售，並於 《蘋果日報》你的優惠 網上獨家發售！